Evit arc’hantaouiñ troiadoù er-maez ha raktresoù ar bloaz e vez lakaet meur a dra e plas. Un daead a vez aozet gant an FSE evit plantañ youl er skolajidi da gregiñ e-barzh an aozañ. An daou glasad o deus rastellet ar muiañ a voneiz evit an FSE a vez profet dezho, d’o zrugarekaat, un devezh e Karanteg. Mont a reont war vor hag ober a reont c’hoarioù war traezhenn ar C’helenn.
Evit ar bloavezh 2018-2019 eo bet graet an droiad er-maez-mañ d’an 2 a viz Gouere, dindan an heol splann en deus degaset imor vat d’an holl. Laouen-kenañ e oa ar skolajidi, evel ma vez gwelet war al luc’hskeudennoù da heul.
Trugarez d’an Ao. Dubru, hor pennguzulier-skol, evit ar pezh a ra evit an FSE hag evit bezañ aozet an droiad er-maez-mañ !