, à droite
D’al lun 11 a viz Meurzh eo bet skolajidi 6ved ha 5ved klas an hentenn divyezhek e sinema La Salamandre. An 18 skolajiad ambrouget gant o c’helennerien Riwal Illien, kelenner war ar brezhoneg, ha Fabrice Cadou, kelenner war an istor-douaroniezh, o deus bet tro da welet ar film bevaat Azur hag Azmar nevez eilmouezhiet e brezhoneg. Kemeret o deus perzh ar skolaji er skignadenn aozet gant KLT (Kerne Leon Treger), kevredigezh a vrud ar brezhoneg e bro Montroulez, ha Daoulagad Breizh, kevredigezh a Zouarnenez a ra war-dro ar skignañ filmoù e brezhoneg e Breizh a-bezh. Daoulagad Breizh a ginnig bep bloaz d’ar skolidi skoliataet en hentennoù divyezhek ha dre soubedigezh da gemer perzh en un droaid skignañ e pep korn ar vro. E-pad 1eurvezh 45 e oa ar skolajidi gant skolidi Diwan Montroulez ha reoù an hentenn divyezhek publik er skolioù Jules Ferry eus Sant-Martin ha Poan-Benn eus Montroulez. Ur c’hant hanterkant bennak a skolidi a ziskouez eo bev-mat ar c’helenn brezhonek e bro Montroulez ! Plijadur e-leizh zo bet o sellet ouzh Azur hag Asmar a dremen er Grennamzer etre Europa hag ar Maghreb. Ur gentel war ar c’henemglev hag an doujañs keit hag ur veaj en istor.
- Azur hag Asmar
- Troiad er sinema evit ar vrezhonegerien
Anouk : Plijus e oa, an tresadennoù a oa dreist.
Lucien : Kavet ’meus plijus peogwir ez eus faltazi, an tresadennoù a zo dreist hag an istor a zo mat-kenañ.
Mathis : Kavet ’meus plijus peogwir ez eus faltazi hag ur seurt enklask.
Gwenvel : Plijet on bet gant an istor peogwir ez eus ur vojenn hag a zo gwir ha peogwir eo brav.
Violaine : Kavet ’meus plijus ar film peogwir eo brav ha graet mat hag e oa ivez farsus.
Théo : Kavet ’meus mat ar film rak eo brav ha spontus.
Lou : Kavet ’meus plijus an istor ha mat e oa e brezhoneg.